வாழ்க்கை
அபன் கனைக்க
அவள் இளிக்க
காதல் ஆரம்பம்
அவன் அணைக்க
அவள் கிளைக்க
வாழ்க்கை ஆரம்பம்
அவன் வடிக்க
அவள் துடிக்க
முதுமை ஆரம்பம்
அவன் கனக்க
அவள் அனுப்ப
பயணம் ஆரம்பம்.
ஆகஸ்ட் 1991
திங்கள், 22 டிசம்பர், 2025
தேவை
காம்பைப் பிடித்துத் திருகி
கசக்கி முகர்ந்து தடவிச்
சுண்ணம் பூசி மெழுகிச் சீவல்
சுத்திச் சுருட்டி கொடுப்பில்
தள்ளி அரைத்துச் சுவைத்து
ஆறடி பாயத் துப்பி - மகிழவோர்
வெற்றிலைக்கு எங்கே போவேன்?
சேவை
கோபம் பொங்கிக் களைத்துப்
பசித்துக் கொடுவாளாய்க்
கீறிப்பிளக்கும் சினத்தோடு
இல்லம் ஏகில் - அங்கென்
சேலைக் கிழத்தி குழல் விரித்தென்
காலைப் பிடித்தோர் காதல்
சேவைக்காய்க் காத்திருப்பாள்
-ஆகஸ்ட் 1991
வியாழன், 30 அக்டோபர், 2025
குற்ற ஆலம் என்னும் தலைப்பில் நான் எழுதிய சிறுகதைகளின் தொகுப்பு அக்டோபர் 5, 2025 அன்று ஸ்காபரோ, கனடாவில் (3600 Kingston Rd.) வெளியிடப்பட்டது.
வானொலி அறிவிப்பாளர் Y.K. நாதனின் நெறிப்படுத்தலில், கவிஞர் பா.அ.ஜயகரன் தலைமையில் நடைபெற்ற இவ்விழாவில் 'காலம்' வெளியீடான இந்நூல் பற்றிய உரைகளைத் தொடர்ந்து நூல் வெளியீடு இடம்பெற்றது.
நூல் பற்றிய மதிப்பீட்டுரைகளை விஞ்ஞானியும் எழுத்தாளருமான வெங்கட் ரமணன் அவர்களும் எழுத்தாளரும் சமூக செயற்பாட்டாளருமான அருண்மொழி வர்மனும் வழங்கியிருந்தனர்.
எழுதாளர் 'பூரணி' மகாலிங்கம் நூலை வெளியீட்டு வைத்தார். சமூக செயற்பாட்டாளரும் எழுத்தாளருமான 'நக்கீரன்' தங்கவேலு, 'தாய் வீடு' ஆசிரியர் திலீப்குமார், ஆன்மீக செயற்பாட்டாளர் சிவசாமி திருச்செல்வம் மற்றும் அரசியல் செயற்பாட்டாளர் மெய்கண்ட தேவன் (சந்திரன்) ஆகியோர் சிறப்பு பிரதிகளை வாங்கிக் கெளரவித்தனர்.
இவ்விழாவை ஒழுங்கு செய்த 'காலம்' செல்வம், மண்டப, தீனி ஒழுங்குகளைச் செய்துதவிய தேடகம் நண்பர்கள், ஒளி, ஒலிப் பதிவுகள் மற்றும் விளம்பரங்களைச் செய்துதவிய 'தடயத்தார்' கிருபா கந்தையா மற்றும் சரீர உதவிகளைச் செய்த அனைத்து நண்பர்களுக்கும் நூலை வாங்கி, வாசித்து, கருத்துக்களைக் கூரிய அனைவருக்கும் எனது மனமார்ந்த நன்றிகள்.
செவ்வாய், 21 அக்டோபர், 2025
யுக யாத்திரை
"இது எந்த யுகம் பிரம்ம தேவரே?
அழைத்த காரணம் அறியேன்!
சொல்லுங்கள்!"
"ஹா..ஹா... வாருங்கள்!
மனிதன் சிருஷ்டித்திருக்கும்
நவ உலகைப் பாருங்கள்!
முக்கி முனகி, கட்டை ,
வண்டியில் ஏறாது
'போர்ச்சில்' வந்து
'போர்ச்சில்' இறங்கும்
புது உலகைப் பாருங்கள்!
சனம் பெருக்கச் சினம் கொண்டு
மறு பால் மணக்காது
சக பால் மணம் செய்யும்
சம உலகைப் பாருங்கள்!
ஆநிரை கவராது
அயலார் நிலம் கொள்ளும்
அற்புதத்தைப் பாருங்கள்!
மனிதப் படைப்புகளே
மனித இனம் கொல்லும்
மயவுலகைப் பாருங்கள்!"
"சற்றே பொறுங்கள் சுவாமி!
ஜெருசலேமிலிருந்து அழைப்பு வருகிறது.
"ஓம்...ஓம்...
சரி ..செய்கிறேன்.."
"மன்னிக்க பிரம தேவரே!
இந்த யுகம் அவர்களுடையதாம்..."
'டுமீல்..டுமீல்'
இதற்கு குழுசேர்:
கருத்துகள் (Atom)
-
இந்தப் படத்தை நேற்று குடும்பத்தோடு சென்று பார்த்தேன். அதை பற்றி எழுதவேண்டுமென்றளவிற்கு அது என்னைப் பாதித்திருக்கிறது. அப் பாதிப்பிற்குப் ப... -
இளசு எனப்படும் இளையராஜா கனடாவுக்கு வருகிறார், மன்னிக்க வேண்டும் கொண்டுவரப்படுகிறார். சில இசை ரசிகர்களுக்குச் சந்தோசம் தான். அந்த சிலரை ... -
திருக்குறள் - மொழி மாற்ற வரலாறு சமீபத்தில் முக நூலில் ஒரு பதிவு வந்தது. ' கட்டாயம் பார்க்கவும்' குறிப்போடு வந்த இப் பதிவைத் த...